I te tau 2023, i huri tō mātou ingoa mai i NZ Museums ki Kōtuia ngā Kete. I takea mai tēnei ingoa i te tuituinga o ngā kete o te mātauranga.
Te takenga mai o te ingoa
I tonoa ētahi mātanga Māori nō Te Papa ki te tuku mai i tētahi ingoa hou. Nā tētahi o ngā mātanga reo, nā Lee Johnson te ingoa o 'Kōtuia ngā Kete' i homai. E hāngai ana tēnei ingoa ki te huhua o ngā whare taonga me ngā mātauranga e mau ana ki te pae tukutuku
Kua takea mai hoki ngā mahi hoahoa i tēnei ingoa.
Te Waitohu
Kua tīkina ake te niho taniwha hei tauira mō te waitohu. Ko te waharoa tēnei ki te marae e whakamarumaru ana, e tiaki ana i ngā taonga o roto.
E rua ngā kōhatu kei roto i te waitohu. Ko Ngā Whatukura ēnei i whakawhiwhia ki a Tāne i tana pikinga ake ki ngā rangi tūhāhā ki te tiki i ngā kete o te mātauranga. Kua tanumia ngā kōhatu, arā, ko Huka ā Tai me Rehutai ki te kōpū o Papatūānuku. Kua mau ngā kōhatu e rua ki ngā āputa ki ia taha o te tihi.
Te hoahoatanga
He tohu ngā momo kano o te kākāriki me te kahurangi o ngā aho o te ao o Tangaroa.
E whakaahua ana te aho me te kākarauri i ngā kōrero mō te haerenga o Tāne ki te tiki ake i ngā kete. I a koe e uru atu ana ki te pae tukutuku ka huri te pō ki te ao mārama, arā, ko te huranga mai tērā o te mātauranga.